Një 26-vjeçar në Tiranë është ndaluar nga policia pasi ka kërcënuar dhe i ka marrë para një të riu. Ai akuzohet për veprën penale “Shtrëngimi me anë të kanosjes ose dhunës për dhënien e pasurisë“.
Hetimet
“Sektori i Krimeve të Rënda ndaj Jetës dhe Pronës, nën drejtimin e Prokurorisë, pas kallëzimit të marrë nga një shtetas për shtrëngim me anë të kanosjes për dhënie pasurie, ka organizuar punën dhe pas një hetimi me medota proaktive kanë organizuar dhe finalizuar me sukses operacionin policor të koduar ‘Transferta’, në kuadër të të cilit u bë kapja dhe ndalimi i shtetasit: M. M., 26 vjeç, banues në Tiranë. Nga hetimet e kryera ka rezultuar se ky shtetas, në periudha të ndryshme kohore, ka shtrënguar me anë të kanosjes për dhënie pasurie duke i marrë një shumë të përgjithshme prej 16.000 euro shtetasit S. A., 23 vjeç. Po në vijim të hetimeve ka rezultuar se shtetasi i dëmtuar, pas shantazheve që i bënte shtetasi M. M., ka kryer transferta të lekëve në drejtim të tij, në periudha të ndryshme kohore”, njoftoi policia.
Një e proceduar
Lidhur me rastin, policia njoftoi procedimin e një vajze për moskallëzim krimi.
U procedua penalisht shtetasja D. B., 23 vjeçe, pasi ka pasur dijeni për ngjarjen dhe nuk ka kallëzuar, sqaroi policia.
