Bashkëpunimi midis Real Madrid dhe Sergio Ramos filloi më 8 Shtator 2005. “Santiago Bernabéu” atë ditë mirëpriti një lojtar të shquar i cili 15 vjet më vonë është bërë një gur themeli i ekipit dhe një legjendë e klubit.
Ramos tani po përgatitet të nisë sezonin e tij të 16-të me Real Madrid, aty ku me krenari të madhe mban shiritin e kapitenit. Debutimin e tij si madrilen ai e bëri dy ditë pas nënshkrimit me klubin pikërisht më 10 shtator 2005, kur skuadra e Celta Vigos vizitonte mitikun “Bernabéu”.
Që atëherë ai ka bërë 650 paraqitje për klubin, një numër që e bën atë lojtarin e katërt më numrin më të madh të paraqitjeve, pas Raul (741) Iker Casillas (725) dhe Manuel Sanchís (710).
Golat e tij vendimtarë në finalet e Ligës së Kampionëve (2014 dhe 2016), Superkupën e Europës (2016) dhe Kupën Botërore të Klubeve (2014 dhe 2018) shërbyen për të rritur më tej statusin e tij legjendar. Ndërkohë, sezoni i kaluar ishte edhe viti më “pjellor” për sa i përket golave të shënuar,ndërsa tashmë 34-vjeçari ka 97 gola në emër të tij.
Jo vetëm që ai është udhëheqësi i mbrojtjes së Real Madrid, ai gjithashtu ka të njëtin rol edhe në ekipin kombëtar spanjoll teksa është lojtari me numrin më të madh të ndeshjeve si kapiten. Ramos mburret me 22 trofe të fituara me Real Madrid; katër kurora të Ligës së Kampionëve dhe Kupa të Botës për Klube, 3 Super Kupa të UEFA-s, pesë tituj kampionati, dy Kupa Mbreti dhe katër Super Kupa Spanjolle.
