Mbrëmjen e sotme ora 20:45, Shqipëria përballet ndaj Lituanisë, ndeshje e vlefshme për Grupin 4 të Ligës C të Kombeve, e cila do të luhet në “Air Albania”.
Për këtë sfidë, trajneri Reja, pritet që të bëjë ndryshime krahasuar me ndeshjen ndaj Bjellorusisë. Strakosha do ta fillojë ndeshjen si titullar ndërsa përpara tij, edhe pse trajneri mund ta konfirmojë pesëshen, pritet që Mihaj të zërë vendin e Veselit.
Gjimshiti e Dermaku plotësojnë treshen e prapavijës, ndërsa Hysaj dhe Trashi me gjasë konfirmohen sërish.
Do të ketë minuta për Armando Brojën. Aktivizimi i 18-vjeçarit duket i sigurt por mbetet për t’u parë nëse trajneri do t’i besojë që në fillimin e ndeshjes apo jo.
Dy të tjerë që pritet të marrin minutat e para me Kombëtaren që nga starti i kësaj ndeshjeje janë Qazim Laçi dhe Endri Çekiçi.
Të dy mesfushorët pritet që të zënë vendet e Bares dhe Abrashit, të cilët kanë vrapuar jashtëzakonisht shumë në Bjellorusi. “Gladiatori” Gjasula pritet të jetë edhe një herë pikë referimi në mesfushë.
Në sulm, Armando Sadiku pritet të ketë besimin për të nisur nga minuta e parë. Megjithatë, edhe për këtë rol ka ende dyshime.
Mbi të gjithë, tri janë edhe alternativat kryesore për dy postet titullare: Manaj, Broja dhe Sadiku.
Formacioni i mundshëm:
Strakosha, Mihaj, Dermaku, Gjimshiti, Hysaj, Trashi, Gjasula, Laçi, Çekiçi, Sadiku, Manaj ose Broja
