Presidenti Ilir Meta ka nisur konsultimet me përfaqësues të partive politike lidhur me caktimin e datës së zgjedhjeve.
Pas takimeve me Idrizin e PDIU dhe Arjan Madhin e PR, takimet kanë vijuar me përfaqësuesit e PAA dhe PBDNJ, përkatësisht Arben Tafaj dhe Vangjel Dule.
Katër partitë bëjnë pjesë në koalicionin e opozitës së bashkuar, të drejtuar nga demokratët, dhe propozimi i tyre është mbajtja e zgjedhjeve më 18 prill. Kjo tregon se opozita duket e unifikuar në qëndrimin e saj për mbajtjen e zgjedhjeve të dielën e parë të periudhës zgjedhore, e cila referuar Kodit të ri Zgjedhor, nis më 15 prill dhe përfundon në 15 maj.
Arben Tafaj, përfaqësues i Partisë Agrare Ambientaliste ka deklaruar pas takimit me presidentin Ilir Meta se ka kërkuar që zgjedhjet të mbahen në të dielën e parë të përcaktuar në kodin e ri zgjedhor, 18 prill.
Tafaj tha se kjo është datë e përshtatshme për shkak se nuk pengon shqiptarët të largohen jashtë vendit për punë sezonale dhe është mes dy pashkëve
“Pata fatin të përfaqësoj partinë në takm me Metën në lidhje me diskutimin për datën e zgjedhjeve në 18 prill. Kjo datë është datë shumë e përshtatshme për shkak se Maji është një periudhë e vëshitirë për shqiptarët pasi duan të ikin në punë sezonale.
Ndërkohë, kreu i PBDNJ, Vangjel Dule u shpreh se qëndrimi i tyre është për një datë sa më të shpejtë të mundshme.
“Për të diskutuar për datën e zgjedhjeve si një akt përgjegjshmërie, me qëllim që të nisë sistematikisht përgatitja e procesit që më në fund edhe vendi ynë të arrijë atë standard i cili përbën realitet të përditshëm në çdo vend demokratik.
Nga këndvështrimi ynë situata, realiteti politik, zhvillimet ekonomike dhe shoqërore kërkojnë zhvillimin e zgjedhjeve në procedurën më të shpejtë. Jemi në pritje të vendimeve të presidentit për të kontribuar edhe ne nga pozicioni ynë. Qëndrimi ynë është i qartë, datën më të shpejtë të mundshme”, u shpreh Dule.
