Kosova dhe Serbia kanë nënshkruar ditën e sotme një marrëveshje ekonomike, në zyrën Ovale në prani të Presidentit të SHBA-ve, Donald Trump.
Marrëveshja përmban disa zotime të palëve për bashkëpunim ekonomik të ndërsjelltë, çka do të sjellë normalizimin e marrëdhënieve mes tyre.
Një nga pikat e marrëveshjes, ka të bëjë me “Minishengenin Ballkanik”, ku thuhet se të dyja palët do t’i bashkohen këtij unioni të ri.
“Të dyja palët do t’i bashkohen “zonës Mini-Shengen”, të prezantuar nga Serbia, Shqipëria dhe Maqedonia në 19 Tetor dhe do të shfrytëzojnë plotësisht përfitime prej saj“, thuhet në marrëveshjen mes palëve.
Dokumenti i referohet marrëveshjes së firmosur nga Edi Raam, Aleksandër Vuçiç dhe Zoran Zaev, e cila parashikon lëvizjen e lirë të qytetarëve, produkteve, kapitalit dhe shërbimeve mes tre vendeve, e njohur ndryshe si “Minishengeni Ballkanik”.
Në atë kohë, Kosova e ka refuzuar një plan të tillë, në mënyrë kategorike. Presidenti Thaçi, shprehej se një gjë e tillë është e pamundur, për sa kohë Kosova nuk njihet nga Serbia.
“Së pari, Kosova, qëllimshëm ishte anashkaluar nga Serbia në Samitin e Parë të kësaj iniciative të re rajonale. Së dyti, vizioni i vetëm i Kosovës mbetet anëtarësimi në BE dhe NATO. Prandaj, ne nuk duam që në asnjë rrethanë ta zëvendësojmë perspektivën tonë euroatlantike me çfarëdo iniciative rajonale. Dhe, së treti, kjo iniciativë rajonale është e pakuptimtë për aq kohë sa Serbia dhe Bosnja dhe Hercegovina nuk e njohin pavarësinë e Kosovës”, deklaroi Thaçi në reagimin e tij.
Por, me sa duket qëndrimi i Kosovës, sa i përket kësaj çështje ka ndryshuar kryekëput dhe tashmë shteti i Kosovës, angazhohet të marrë pjesë në këtë proces, sëbashku me Serbinë, Shqipërinë dhe Maqedoninë e Veriut.
