Kryetarja e LSI-së, Monika Kryemadhi deklaroi pas takimit me Presidentin Ilir Meta për datën e zgjedhjeve, se ato duhet të ishin kryer para dy vitesh.
“Për LSI, zgjedhjet duhej të ishin bërë 2 vite më parë. Jemi shumë vonë. Nuk është çështje date, është çështje e dhënies së shqiptarëve të të drejtës për të pasur zgjedhje të lira dhe të ndershme dhe për t’i dhënë mundësinë shqiptarëve që një orë e më përpara të jenë anëtarë të BE. I bëmë të qartë Presidentit që LS do të zbatojë çdo vendim dhe dekret të Presidentit që është kushtetues, do të marrë pjesë në çdo proces zgjedhor që do t’u garantojë qytetarëve qeverinë e ardhshme, atë qeveri evropiane për të cilën kanë aspiruar prej shumë kohësh, theksoi Kryemadhi.
LSI do zbatojë çdo dekret të Presidentit që është kushtetues, shtoi ajo.
Sa më shpejt zgjedhjet aq më mirë për qytetarët, deklaroi kryetarja e LSI-së.
Më herët, Basha, Rama dhe kryetarë të partive të vogla zhvilluan takime me Metën. Takime që janë ndërprerë për momentin për të rifilluar në orën 17:30.
Kryetari i PD, Lulzim Basha u shpreh për gazetarët pas takimit me kreun e shtetit se, “për ne i rëndësishëm që procesi të jetë i lirë e i ndershëm”.
Rama, sipas burimeve nga Presidenca, tha në takimin me Metën, se ishte gati për zgjedhje në çdo datë, përveç 2 Majit që janë Pashkët Ortodokse.
Sipas Kushtetutës, periudhë e mbajtjes së zgjedhjeve është 15 Prill-15 Maj. Partitë e vogla opozitare kanë kërkuar që zgjedhjet të mbahen në periudhën më të afërt që lejon Kushtetuta. E në këtë rast është data 18 Prill, e Diela më e afërt pas 15 Prillit.
