Nga Gjergji Koja
Donika Prela, prokurore në proces shkarkimi, sot u perball me KPA, në një proces të ankimuar nga Komisioneri Publik. Ky i fundit në raportin e tij kërkon shkarkimin duke argumentuar këtë me probleme mbi pasurinë, por edhe dy standardet që ka përdorur në dy çështje të njëjta, me persona të ndryshëm. Përtej asaj që thotë Komisioneri dhe mbrojtjes që Donika i bën vetes, në seancën e sotme prokurorja u mundua të viktimizohet.
Ajo u paraqit si një viktimë e një portali mediatik, që ndoshta për etikë ose arsye tjetër, nuk preferoi ti përmendë emrin. Pastaj e paraqiti këtë sulm mediatik si një komplot që po i bëhej asaj nga individë që ka pasur nën hetim, personazhe që u janë prekur interesat, e të tjerë persona që ndoshta as e kane idenë se kush është kjo prokurore, si u promovua, çfarë ka drejtuar dhe çfarë bilanci ka në punën e saj si drejtuese.
Donika është në të drejtën e saj të zgjedhë çdo lloj mbrojtjeje, qoftë duke u viktimizuar, qoftë duke ëndërruar për “grupet armiqësore” dhe ato “puçiste”. Por, kjo nuk e zgjidh problemin me të cilën përballet në KPA, as dyshimet që ka ngritur Komisioneri Publik. Edhe sikur gazetarët, portali, ish-prokurorë, prokurorë, e çdokush që në sytë e Donikës është pjesë e skenarit, të dalin dhe të thonë se prokurorja duhet të vazhdojë karrierën, sërisht kjo nuk ia zgjidh problemin.
Prokurorja, sipas Komisionerit Publik, ka probleme me kriteret e vetting, për të cilat janë shkarkuar dhe do shkarkohen edhe shumë prokurorë dhe gjyqtarë, përsa kohë do të vazhdojë ky proces. Por në asnjë rast nuk ka ndodhur që subjekti të shfaqet në një sallë gjyqi si viktimë, as duke tentuar zvarritjen, as duke tentuar shpëtimin duke hedhur akuza ndaj medias apo duke zbuluar grupet puçiste.
Deri më tani të gjithë janë paraqitur në KPK apo KPA të paktën me dinjitet, kanë pranuar në sallë të dëgjojnë argumenta, kanë paraqitur kundërargumentat, dhe qetesisht kanë pritur vendimin. Më pas jashtë asaj salle ku sot ndodhej edhe prokurorja kanë bërë deklarata, kanë mbajtur qëndrime, kanë shfryrë dufin apo kanë paralajmëruar se do i drejtohen Strasburgut.
Asnjë prej tyre nuk ka tentuar të mbrohet me skenarë puçistë, edhe pse mund të kenë pasur një karrierë shumë më të vlefshme, dhe që realisht mund të kenë firmosur dënime të organizatave reale kriminale, dhe jo ato që mund të shfaqen në ëndrrat e ndokujt. Sot zhgënjeve, u paraqite dobët, madje më dobët se nxënësit që nuk kanë lexuar dhe tentojnë të kalojnë provimin. Sot prokurorja e pati një shans të tregonte kurajo. Megjithatë sërisht mund të kujtohet si një nga emrat që siç u katapultua ashtu edhe zbriti shkallët, pa lënë gjurmë.
