Houston Rockets bëhet skuadra e fundit që siguron Play Off-in në NBA, pasi ia doli të triumfojë me rezultatin e ngushtë 104-102 përballë Oklahoma City Thunder dhe të kualifikohet me bilancin e përgjithshëm 4-3.
Në “AdventHealth Arena” të Orlandos u zhvillua një përballje mjaft spektakolare dhe e luftuar, pasi të dy skuadrat e kishin të qartë që vetëm njëra do të mund të avanconte më tej, ndërsa në fund fati ishte me Rockets, që tani do të gjejë përballë Los Angeles Lakers në çerekfinale.
Fraksioni i parë dhe i katërt i ndeshjes shkuan në favor të City Thunder, ndonëse me avantazh të lehtë, ndërsa Houston fitoi pjesën e dytë dhe të tretë, duke ia dalë të ruajë edhe kryesimin e rezultatit final.
James Harden, i cili ishte në vështirësi në fazën ofensive të lojës, bëri diferencën me anë të një blloku në sekondin e fundit të ndeshjes duke shmangur një eliminim të mundshëm.
Ndëkohë pak kilometra më tutje, në “HP Field House” të Orlandos, Miami Heat mposhti Milwaukee Bucks edhe në përballjen e dytë çerekfinale, duke marrë një avantazh 2-0 me ndeshje dhe duke rritur shanset për të kaluar në gjysmëfinale.
Bucks e nisën shumë keq ndeshjen dhe në fund të fraksionit të parë e panë veten në disavantazh të 9 pikëve, ndërsa më pas provuan reagimin dhe arritën të fitojnë të tre pjesët e tjera, por pa ia dalë të përmbysin sfidën, që përfundoi me shifrat 114-116.
Një tjetër dështim për Giannis Antetonkounmpo, i cili vazhdon të zhgënjejë në fazën “Playoff” ndryshe nga forma e lartë që tregon në sezonin e rregullt.
