Një 48-vjeçar me iniciale N.K. është vënë në pranga nga policia në Tiranë, pasi akuzohet se ka tentuar të përdhunojë kolegen. Të dy punonin në një furrë buke në Kombinat.
Policia është vënë në lëvizje pas kallëzimit të një 46-vjeçareje. Kjo e fundit ka treguar se si zakonisht ishte duke punuar, kur kolegu i saj tentoi që të kryente marrëdhënie intime me të, bënë me dije burime policore.
Gruaja ka rrëfyer para uniformave blu se ka kundërshtuar. Pas episodit të ndodhur rreth orës 1 të mëngjesit, ajo është paraqitur në komisariatin 6 për të bërë kallëzim. Pas marrjes së dëshmisë së 46-vjeçares, efektivët e policisë kanë vënë në pranga kolegun e saj, të akuzuar për tentativë përdhunimi.
Lidhur me rastin, një njoftim të shkurtër e dha edhe policia e Tiranës, pas raportimeve mediatike. “Specialistët për Hetimin e Krimit në Komisariatin e Policisë Nr.6, bënë arrestimin në flagrancë të shtetasit N.K., 48 vjeç, pasi ka tentuar të kryejë mardhënie seksuale me dhunë me kolegen e punës së tij”, njoftoi shkurtimisht policia.
Krimet seksuale kanë shënuar një tendencë rritëse referuar të dhënave zyrtare. Sipas raportit të INSTAT bazuar në të dhënat e raportuara nga vetë Policia, krimet seksuale shënuan rritje gjatë vitit 2019, krahasuar me vitin paraardhës. Më konkretisht, gjatë 2019-ës u regjistruan 155 krime seksuale, 45 më shumë se në vitin 2018.
