Basha premton rritje pagash deri në 1 200 euro për bluzat e bardha dhe anullim konçesionesh në shendetësi

Kryetari i PD-së Lulzim Basha premtoi rritje rrogash deri në 1200 euro për mjekët dhe infermierët në vend.

“Me planin tonë ne do të mundësojmë ndryshimin e madh në shëndetësi me paga dinjitoze të niveleve rajonale për ta: 1200 euro për mjekët dhe 700 euro për infermierët”, shkruan në një postim në FB, Basha, të mërkurën.

Ai premtoi gjthashtu se do të anullojë “koncesionet korruptive” dhe “paratë do të përdoren për mbështetje reale për mjekët dhe infermierët, me rritje pagash, me pajisje dhe kushte më të mira për tju shërbyer qytetarëve”.

Basha e quajti deklaratën e Ramës dje për rritje pagash për shëndetësinë thejsht propagandë. “Rritja e pagave të tyre është jetike por ajo duhet të jetë reale dhe jo elektorale”, shtoi ai.

Ai akuzoi qeverinë “që i çon paratë e taksave të shqiptarëve tek koncesionet korruptive, dhe shpenzimet për shëndetin publik janë më të ulëtat në rajon”.

Reagimi i Bashës

Në reagim, kryedemokrati shprehet:

Mjekët dhe infermierët tanë kanë nevojë për mbështetje dhe mbrojtje të veçantë nga shteti për shërbimin kolosal që i kanë bërë vendit, në veçanti në këto kohë pandemie. Rritja e pagave të tyre është jetike por ajo duhet të jetë reale dhe jo elektorale.

Shqipëria i ka të gjitha mundësitë për ta trajtuar me dinjitet personelin shëndetësor. Por kjo është e pamundur sa kohë që kemi një qeveri që i çon paratë e taksave të shqiptarëve tek koncesionet korruptive, dhe shpenzimet për shëndetin publik janë më të ulëtat në rajon.