Kompania kineze e bioteknologjisë, Sinovac, deklaroi se vaksina e saj është efektive kundër Covid-19 në të gjithë botën. Yin Ëeidong, Kryetari i Bordit dhe shef ekzekutiv i Sinovac Biotech e njoftoi lajmin në një intervistë ekskluzive në Rrjetin Global Kinez të Televizionit.
“Siç e dini, që nga muaji prill kemi pasur raste të importuara nga jashtë. Ne kemi marrë mbi 20 lloje të ndryshme të virusit, te njerëzit që vinin në Kinë nga Shtetet e Bashkuara, Europa dhe vende të tjera.
Më pas kemi përdorur serumin imun të vaksinës tonë për të neutralizuar virusin. Dhe rezultati ishte se të gjithë janë neutralizuar, pavarësisht se nga e kanë pasur origjinën. Pra, vaksina jonë mund ti neutralizojë të gjithë llojet e viruseve në botë. Mund të parashikojmë se vaksina jonë do të ketë një efekt mbrojtës në botë”, deklaroi Yin. Sipas tij, vaksina do të shpërndahet edhe në vende të tjera të botës sapo të prodhohet.
“Fabrikat tona kanë një kapacitet prodhimi prej 300 milionë doza në vit. Ky kapacitet mund të plotësojë kërkesën e brendshme dhe të disa vendeve të tjera”, shtoi Yin. Kina ja doli ta mbajë nën kontroll pandeminë brenda territorit të saj, pas disa muajsh pune kolosale, që nga shpërthimi i saj në qytetin e Vuhanit në fillim të vitit. /SCAN
