Një histori përndjekjeje në Tiranë ka rrezikuar të kthehet në një ngjarje tragjike, me një të re e cila ka tentuar të vetëvritet. Këtë të Shtunë, Policia e Tiranës njoftoi arrestimin e një 33-vjeçari. Burime zyrtare bënë me dije se ndaj tij rëndojnë akuzat për veprat penale “Përndjekja”, “Përdorimi me keqdashje i thirrjeve telefonike” dhe “Shkaktimi i vetëvrasjes”.
Hetimet e policisë nisën pas kallëzimit të vajzës.
“Specialistët për Hetimin e Krimit në Komisariatin e Policisë Nr.2, pas kallëzimit të marrë nga shtetasja S.Sh., 28 vjeç, se shtetasi K.V., e përndiqte dhe telefonuar vazhdimisht që prej muajit Janar, duke i shkaktuar ankth dhe pasiguri, e cila për pasojë kishte tentuar vetëvrasjen, menjëherë organizuan punën për gjetjen, lokalizimin dhe kapjen e këtij shtetasi. Bazuar dhe në informacionet e marra në rrugë operative u bë e mundur kapja dhe ndalimi i shtetasit K.V., 33 vjeç, banues në Tiranë”, njoftoi policia.
Fashikujt i kanë kaluar prokurorisë së rrethit, që pritet t’ia paraqesë gjykatës së Tiranës.
