Disa të rinj anëtarë të Organizatës Politike (OP) kanë hyrë brenda zyrave të Inspektoratit Shtetëror të Punës dhe kanë protestuar me pankarta në duar, pas humbjes së jetës një ditë më parë të një punëtori.
Sipas OP kjo është vdekja e 22-të brenda vitit e punëtorëve, ndërkohë që asnjë masë ndëshkimore nuk ëhstë marrë daj subjekteve të cilat nuk ju sigurojnë as mbrojtjen minimale të punësuarve.
Anëtarët e OP akuzojnë kryeminsitrin edi Rama si një shërëtor të oligarkëve dhe një peson që shtyp shqiptarët e varfër.
Ja postimi i plotë i OP:
NJË SHTET QË FLE MBI GJAKUN E PUNËTORËVE
Dje vdiq i 22-ti punëtor prej fillimit të vitit. Sot paradite një grup aktivistësh të Organizatës Politike u futën në mjediset e Inspektoratit Shtetëror të Punës për të protestuar ndaj indiferencës së këtij institucioni për të garantuar jetën dhe shëndetin e punëtorëve. Zyrat i gjetëm bosh, ndërkohë që një pjesë e zyrtarëve shulloheshin në kafenenë ngjitur, prej ku njëri syresh, me pamje dhe sjellje halabaku partiak, guxoi të ngrejë dorë ndaj aktivistëve.
Edhe pse puna është ndërprerë dhe kufizuar për muaj të tërë për shkak të pandemisë, deri më sot e kanë humbur jetën 22 punëtorë dhe janë regjistruar 89 aksidente. Në të gjitha rastet jeta dhe shëndeti i punëtorëve janë sakrifikuar për fitimin e një grushti të privilegjuarish të pangopshëm.
Numri i të aksidentuarve në vendin e punës rritet vit pas viti. Më 2018 u regjistruan 27 të vdekur, ndërsa në vitin 2019 u arrit niveli i kobshëm i 38 të vdekurve në vendin e punës. Sektori më vrastar i ekonomisë mbetet ndërtimi. Epshi i oligarkëve për fitime të shpejta e të mëdha nuk po shkatërron thjesht urbanistikën dhe jetueshmërinë e qytetit, por mbi të gjitha po u merr jetën gjithnjë e më shumë punëtorëve, të cilët nuk kanë asnjë mundësi zgjedhjeje përtej binomit të frikshëm: uri prej papunësisë ose rrezik vdekjeje nga puna.
Kjo situatë nuk është e rastësishme. Ajo është rezultat i një mënyre qeverisjeje që punëtorët i konsideron miza që mund të shkelen me këmbë nga të pushtetshmit e ekonomisë. Në krye të qeverisë është një njeri që mburret me mungesën e sindikatave, i përçmon njerëzit e punës dhe u shërben pa fije skrupulli oligarkëve.
Ne, aktivistët e Organizatës Politike, do t’i intensifikojmë përpjekjet që jeta, dinjiteti dhe mirëqenia e punëtorëve të jenë mbi fitimin e pandershëm.
#MePunëtorët
