Indrit Bajraktari, 24 vjeç nga fshati Kullaj (Postribë – Shkodër), është vënë në pranga një ditë pasi në Velipojë, u gjet në det trupi i pajetë e një 17-vjeçarje.
“Nga tërësia e veprimeve hetimore rezultoi se më datën 19 Gusht rreth orës 14:00, në vendin e quajtur Vilu, plazh-Velipojë, ky shtetas ka hyrë në det me motor uji të marrë me qera së bashku me shtetasen E. D., 17 vjeçe, banuese në Bathore. Rreth orës 16:30, ky shtetas ka dalë në breg pa motorin e ujit duke lënë të mbytur në ujë shtetasen E. D., e cila kishte ardhur për pushime së bashku me familjen e saj”, njoftoi policia.
Në cilësinë e provës materiale u sekuestrua çelësi i motorit, shtuan të njëjtat burime.
Akuzat që ka ngritur policia ndaj të riut janë: “Shkaktimi i vetëvrasjes”, “Moskallëzimi i krimit” dhe “Veprime që pengojnë zbulimin e së vërtetës”.
Burime policore thanë se Bajraktari, ka deklaruara para uniformave blu se, vajza ka rrëshqitur nga skafi dhe është mbytur në det. Ai shton se më pas nuk mban mend se çfarë ka ndodhur.
