Për pesë ditë me radhë, qytetarë shqiptarë, fëmijë e të moshuar, nën vapën zhuritëse të Gushtit, pa ujë e ushqime, prisnin të kalonin Kavajën për të arritur tokën greke. Shumë u transportuan në spital, të tjerë u panë të humbnin ndjenjat në përpjekje për të arritur doganën në këmbë dhe ngjarja më tragjike: Një fëmijë 10 vjeç, që me familjen priste të kalonte në Greqi, humbi jetën pasi u përplas nga një autoambulancë që sipas autoriteteve, po transportonte një të sëmurë për në spital.
Vetëm pas ditësh pritje në radhë kilometrike, më në fund u arrit që situata të merrte zgjidhje.
Pavarësisht dramës, një reagim i pazakontë vjen nga Ilir Beqaj. Në një emision televiziv, ai deklaroi se situata “nuk ishte kaotike”.
Ish-ministri i Shëndetësisë, i akuzuar nga opozita si një ndër hajdutët më të mëdhenj të kabinetit qeveritar, shkon edhe më tej duke bërë përgjegjës për radhët e gjata të krijuara qytetarët. Sipas tij, ata u dyndën në një kohë drejt Kakavijës.
“Të hënën dhe të martën ka 1/10 më pak njerëz se javën që kaloi. Pse ndodhi kjo? Njerëzit e dinin që me datë 17 ndryshon regjimi dhe u dyndën me 14,15,16 dhe natyrisht në kohë do të ketë dhe numra të shtuar. Nuk ishte situatë kaotike, por shumë e rënduar se të gjithë njerëzit e lanë që të mos shfrytëzonin regjimin e ri të datës 17 por u dyndën në pikat kufitare”, deklaroi ai për “Fax Web”.
Më tej, sulmon dhe opozitën:
“Ajo që është unike në Shqipëri është sjellja krejt absurde e të gjitha figurave kryesore publike të opozitës”, u shpreh Beqaj.
Sa i përket deklaratës së Presidentit Meta se gjithçka ndodhi për shkak të mungesës së informacionit, Beqja e cilësoi “absurd” pasi sipas tij, të gjithë personat që hynë në Shqipëri ishin të pajisur me dokumentin ku jepeshin detaje për regjimin e datës 17.
“E gjitha kjo është një arsyetim absurd. Po të ishim përballur me mungesë informacioni, nuk do ishim në Kakavijë. Ata shkuan në Kakavijë se e dinin që ndryshon regjimi. U turrën të 15 mijët të shkonin ata fundjavë, ishte zgjedhje e tyre. Ata që kanë kaluar të hënë dhe të martë, kanë kaluar pa radhë por nën regjimin e ri që vendosi shteti ku ata ose janë shtetas sic jua thashë 30% ishin grekë, ndërsa të tjerët janë persona që kanë qëndrim të përhershëm në Greqi. Secili prej tyre kur ka ardhur në Kakavijë apo Kapshticë nga Greqia për në Shqipëri ka marrë një dokument në gjuhën greke dhe shqipe ku i është thënë që me datën 17 do të ketë regjim të ri. Kanë qenë të informuar, prandaj u bë grumbullim shumë i madh atje”, tha Beqja.
