Një 61-vjeçar i dënuar për vrasje në vitin 1994 dhe i arratisur më pas nga burgu në 1997-ën, është vënë në pranga pas 23 vitesh në kërkim policor.
Fran Prendi 61 vjeç, lindur në fshatin Buhot (Njësia Administrative Rrape Bashkia Puke) është vënë në pranga në pikën kufitare të Hanit të Hotit.
Policia sqaroi se më 5 Prill 1994, ai është dënuar me burgim të përjetshëm nga Gjykata e Rrethit Gjyqësor Pukë, për veprën penale të “Vrasje me dashje për motive të dobëta”.
Më 9 Prill 1992, rreth orës 19.00, në vendin e quajtur tek rezervuari i qytetit Pukë, ka kryer krimin e vrasjes për motive të dobëta të një shtetasi.
Për këtë krim ky shtetas ishte arrestuar dhe ka qenë duke vuajtur dënimin në burgun e Bënçës Tepelene, por me ngjarjet e vitit 1997, është larguar nga burgu.
“Falë bashkëpunimit të Njësisë së Posaçme të Kërkimit ‘Fast’, me strukturat homologe të vendeve evropiane që bëjnë pjesë në rrjetin ENFAST, u mor informacion për ardhjen e këtij shtetasi në drejtim të Shqipërisë, i cili ë pikën e kalimit kufitar ka dhënë gjeneralitete të tjera me qëllim mos identifikimin, por është vënë në pranga pas verifikimeve të hollësishme. Ky shtetas bënte pjesë në listën me 50 më të kërkuarit që janë objekt i punës së kësaj njësie të posaçme për ti kapur”, njoftoi policia e Shkodrës.
