PSG ka arritur në finalen e Champions Leagues për herë të parë në histori. Kampionët e Francës dominuan totalisht skuadrën e Leipzigut duke e mposhtur me rezultatin 3-0. Ekipi i Tuchel e nisi ndeshjen me vrull dhe arriti të shënonte shumë shpejt me anë të Marquinhos.
Mbrojtësi mori një pasim të mirë nga Di Maria në minutën e 13′ dhe me një shkëputje të mirë me kokë e dërgoi në rrjetë për 1-0. Furia e francezëve nuk u ndal dhe presingu i tyre vuri në vështirësi mbrojtjen e gjermanëve.
Portieri Gulasci gaboi në të 42′ dhe PSG nuk fali në kundërsulm me Neymar dhe Di Marian. Pjesa e parë u mbyll me golin e argjentinasit për 2-0. Pjesa e dytë pa sërish parisienët në kontroll të lojës, ndërsa Leipzigu i pafuqishëm për të reaguar.
Djemtë e Tuchel kontrolluan ndeshjen dhe mbajtën topin në zotërim. Bernat shënoi për 3-0 në të 56′, sërish i ndihmuar nga pasiguria e mbrojtjes kundërshtare. PSG e sheh veten për herë të parë në finalen e Championsit, aty ku do të presë fituesin e çiftit Bayern-Lyon.
