Të punësuarit apo ish të punësuarit në subjektet e transportit publik, qytetas dhe ndërqytetas, do të përfitojnë një ndihmë financiare nga qeveria në masën e 26 mijë lekëve, për shkak të situatës së krijuar nga COVID -19.
Vendimi ka hyrë në fuqi dhe sipas tij, ndihmën e përfitojnë punonjësit e deklaruar në listëpagesat e këtyre subjekteve të deklaruara për periudhën tatimore shkurt 2020, pavarësisht nëse kanë përfituar ose jo nga paketat e mëparshme të ndihmës financiare, të dhënë për këtë qëllim. Për punonjësit që kanë përfituar një pagë lufte, pagesa do të kryhet automatikisht nga administrata tatimore, në bazë të të dhënave që kjo e fundit disponon.
Aplikimi për të përfituar ndihmën financiare për punonjësit apo ish punonjësit e tjerë, bëhet nga subjekti i të punësuarit. Në rastet e mosaplikimit nga ana e subjektit, ndihma financiare për të punësuarit do të jepet menjëherë pas miratimit nga administrata tatimore të aplikimit individual të tyre.
Miratimi kryhet pas verifikimit të kritereve, bazuar në të dhënat që administrata tatimore disponon apo të dhënat që të punësuarit do të dorëzojnë. Subjektet/individët aplikues duhet të paraqesin pranë Drejtorisë së Përgjithshme të Tatimeve, nëpërmjet portalit e-Filing, kërkesën me të dhënat e përfituesve, ku përfshihen: të dhënat identifikuese të subjektit tatimpagues të pajisur me NIUS; të dhënat identifikuese të përfituesve, përfshirë: emrin, mbiemrin, numrin e telefonit, adresën e email-it;numrin personal të identifikimit të përfituesit; bankën ku përfituesi ka llogarinë rrjedhëse bankare; IBAN-in e llogarisë bankare.
