Andrea Pirlo raportohet se ka qenë në kontakt me Cristiano Ronaldon për ta siguruar atë për të ardhmen e tij te Juventusi në sezonin e ardhshëm.
Sulmuesi portugez është përfolur për një largim të mundshëm nga bardhezinjtë. Por sipas La Gazzetta dello Sport , trajneri i ri i Juves ka qenë në kontakt me Ronaldon për “të prezantuar veten” dhe për t’i treguar portugezit qëllimet e tij si trajner.
Raporti gjithashtu nënvizon që Pirlo ka biseduar me 35-vjeçarin me anë të telefonit, teksa i ka bërë të qartë anësorit që do të jetë i pashitshëm këtë verë.
Për më tepër, Ronaldo konsiderohet si një element thelbësor i ekipit dhe përparësia e klubit do të jetë gjetja e një sulmuesi tjetër për të luajtur përkrah tij.
Në sezonin që sapo u mbyll, Cristiano Ronaldo, u bë golashënuesi më i mirë në të gjithë historinë e bardhezinjve për sa i përket numrit të golave brenda një sezoni. Ai arriti të shënonte 37 gola në 46 paraqitje.
