Ish-kryeministri Sali Berisha ka publikuar në FB disa fotografi të ministres së Mbrojtjes Olta Xhaccka, e cila shfaqet në një lokal. Pranë saj janë një grup njerëzish, të gjithë pa maskë, në një ambient ku distancomi fizik nuk respektohet.
Fotot, sipas ish-kryeministrit, janë shkrepur në një hotel me 5 yje në Himarë, pas kthimit të ministres nga Kakavija, një ditë më parë.
“Ndrikull Xhaçka nga Kakavia kthehet dhe shpreh pikellimin e saj ne Hotelin me pese yje ne Himare. Foto tregon se respekton fort edhe distancen sociale”, shkruan Berisha në komentin që shoqëron fotot.
Një ditë më parë, ministria shkoi në Kakavijë, ku dha një prononcim për gazetarët. Pavarësisht pranisë së saj, situata atje vijon të mbetet kaotike, me radhët e makinave që sa vijnë e shtohen, në pritje për të kaluar kufirin për në Greqi. Disa prej qytetarëve, janë shprehur se kanë tre ditë që presin në radhë dhe në temperatura të larta. Shumë prej tyre kanë shfaqur shqetësime shëndetësore dhe ka pasur nga ata që janë transportuar në spital.
Radhët janë shtuar për shkak të rregullave të palës greke, që e mbyll doganën gjatë natës dhe nuk lejon asnjë udhëtar të kalojë kufirin pa bërë më parë testin e COVID.
Autoritetet shqiptare ndërkohë mbeten të pafuqishme për ti dhënë zgjidhje situatës.
Përveç Kakavijës, edhe në pikën tjetër kufitare me Greqinë – Kapshticë – situata shfaqet problematike.
