Jo vetëm në Kakavijë, por edhe në Kapshticë, janë krijuar rradhë kilometrike të automjeteve që presin të kalojnë në Greqi.
Në Kapshticë rradha e automjeteve mëngjesin e së shtunës ka arritur 4 km. Raportohet se në PKK të Kapshticës pala shqiptare po punon me 5 sportele, ndërsa ajo greke me 3.
Sot është dita e 4-rt kur me mijëra shqiptarë po vuajnë në pikat e kalimit kufitar me Greqinë, ndërsa situata sa vjen e rëndohet.
Referuar shifrave ditën e djeshme nga PKK e Kakavijës kanë kaluar në territorin grek mbi 4500 shqiptarë, ndërsa vonesat që po krijohen nga autoritet greke kanë të bëjnë me rregullat e reja, ku çdo shtetas është i detyruar të bëjë testin e Covid-19.
Në Kakavijë janë vetëm dy mjekë që marrin tamponët, ndërsa negociatat mes Ministrisë së Jashtme shqiptare dhe asaj greke, nuk kanë dhënë asnjë rezultat.
Pala greke prej orës 23:00 deri në 06:00 nuk punon, çka shton rradhët e pritjes. Një ditë më parë, disa qytetarë kanë shfaqur probleme shëndetësore për shkak të temperaturave të larta, duke detyruar autoritetet shqiptare që t´i transportojnë drejt spitalit rajonal të Gjirokastrës.
