Mbrojtësi lezhjan Renato Malota njoftoi ditën e djeshme largimin nga Vllaznia, pas dy vitesh e gjysmë në Shkodër, ndërsa në orët e mbrëmjes ka firmosur për një tjetër skuadër.
Burime për Supersport konfirmojnë se 31-vjeçari lezhjan është transferuar te Laçi dhe mbrëmjen e sotme ka hedhur firmën mbi kontratë, ndërsa nga nesër do të jetë në dispozicion të trajnerit Armando Cungu.
Renato Malota është një nga qendërmbrojtësit më me eksperiencë në Kategorinë Superiore, pasi përveç Vllaznisë, ka veshur edhe fanellat e klubeve si Kukësi e Partizani, ndërsa tani pritet të jetë një vlerë e shtuar për prapavijën e kurbinasve.
Ndërkohë klubit të Laçit i janë bashkuar edhe ish mbrojtësi i Luftëtarit Aurel Demo dhe ish mesfushori i Flamurtarit, Lukas Ramos, të cilët trajneri Cungu i provoi edhe në miqësoren ndaj Apolonisë pasditen e sotme.
