Egnatia e Rrogozhinës ka nisur një projekt mjaft interesant, që synon ngjitjen e skuadrës në elitën e futbollit shqiptar dhe ditën e djeshme prezantuan në pankinë Gugash Maganin, një emër mjaft i njohur dhe me eksperiencë si në Kategorinë Superiore, ashtu edhe në të parën.
Pasditen e sotme klubi nga Rrogozhina ka befasuar sërish, pasi ka njoftuar akordin me sulmuesin anësor shkodran Ndriçim Shtubina, i cili sezonin e fundit ishte pjesë e Vllaznisë së Shkodrës dhe ndihmoi kuqeblutë të sigurojnë mbijetesën në Superiore.
Me përfundimin e sezonit, mbaroi edhe kontrata e Shtubinës me Vllazninë, ndërsa nuk dihet ende nëse transferimi te Egnatia erdhi për dëshirë të vetë 33-vjeçarit, apo për mungesë të një oferte për rinovim nga ana e klubit shkodran.
Gjithsesi ajo që vlen për klubin e Egnatias, është se afrimi i sulmuesit shkodran ka shtuar ndjeshëm eksperiencën dhe cilësinë, ndërsa për Shtubinën do të jetë hera e parë që do të luajë në Kategorinë e Parë. /supersport
