Frikë në radhët e uniformave blu në komisariatin e policisë në Kuçovë teksa një prej drejtuesve është konfirmuar pozitiv me COVID-19.
BoldNews mëson se shefi i rendit në komisariatin e Kuçovës është konfirmuar pozitiv së fundmi dhe është karantinuar në banesën e tij në Durrës.
Burime pranë komisariatit thanë për BoldNews se, disa efektivë të tjerë, që për shkak të detyrës kanë pasur kontakte me shefin e rendit, pritet të kryejnë tamponin, për të konfirmuar nëse janë prekur ose jo nga koronavirusi.
Ndërkohë, një ditë më parë, janë dezinfektuar ambientet e komisariatit.
Ditët e fundit, Ministria e Shëndetësisë ka raportuar për pesë raste të reja me koronavirus në qytetin e Kuçovës. Ndërkohë, në qarkun Berat, sipas të njëjtave burime, janë 49 raste aktive.
Në bilancin ditor të së Hënës, autoritetet njoftuan për 125 raste të reja me COVID-19 dhe 1 humbje jete. Rastet aktive në të gjithë vendin janë rritur në 2957, ndërsa jetët e humbura 200.
/BoldNews.al/
