Të tjera detaje janë zbuluar nga krimi makabër, që ndodhi mbrëmjen e kaluar në Pogradec, ku djali masakroi me thikë të ëmën.
“Balkanweb” raporton se krimi tronditës ka ndodhur në sy të mbesës së viktimës 15 vjeçe.
Kjo e fundit ka parë që i ati, 44-vjeçari Olsi Çekiçi, po sulmonte me thikë gjyshen, Firdes Çekiçi, dhe ka njoftuar me telefon policinë, duke u larguar menjëherë nga banesa me një biçikletë nga frika.
Patrulla e Përgjithshme është nisur drejt adresës që iu ka dhënë adoleshentja, ku kanë gjetur autorin e krimit duke tentuar të vrasë të vëllanë, teksa e ëma kishte ndërruar jetë.
Ndërhyrja e menjëhershme e patrullës bëri që ngjarja të mos kishte përmasa edhe më të mëdha. Ndërkohë, mësohet se 15-vjeçarja, pasi ka dalë nga shtëpia, ka gjetur një patrullë policie dhe iu ka rrëfyer ngjarjen.
Sipas saj, i ati e ndiqte gjyshen nëpër shtëpi me thikë dhe i thoshte ‘boll jetove’. Autori i krimit të tmerrshëm ka qenë i dënuar në Itali për drogë dhe vjedhje në vitin 2013, ndërsa prej vitit 2017 ai ishte kthyer në Shqipëri.
Autori ishte aktiv në rrjetet sociale
Olsi Çekiçi, autori i krimit makabër është shumë aktiv edhe në rrjetet sociale.
Ai bënte postime të njëpasnjëshme, ku shfaqej edhe si besimtar dhe falënderon Allahun por edhe jep mesazhin se beson në dashuri.
44-vjeçari shfaqet si një fans i këngëtares së njohur Dua Lipa, pasi më 30 qershor të këtij viti ka publikuar disa foto të saj. Ajo që vihet re tjetër është nuk kanë munguar as komentet nga të afërmit dhe miqtë e tij, në fotot dhe postimet që bënte 44-vjeçari.
Olsi Çekiçi pas sherreve dhe dhunës së përditshme mori thikën dhe masakroi nënën e tij, 70-vjeçare. Ai i preku kokën nënë së tij dhe e vari në derë të shtëpisë. 44-vjeçari la të plagosur edhe vëllain e tij. Ai u arrestua menjëherë nga policia dhe u gjet i përlyer në gjak.
Në dëshminë e tij në polici, 44-vjeçari është shfaqur i qetë dhe i pa penduar për vrasjen e nënës së tij, pasi sipas tij kjo do të ndodhte një ditë.
”Nuk pendohem. Kjo do te ndodhte një ditë. Amanet vajzën dhe vëllanë”. Ai është person me precedent penal, pasi ka qenë më parë i arrestuar në Greqi, Belgjikë e Itali për drogë dhe ka vuajtur dënimin në burgun e Zaharisë në vend.
Olsi ka qenë i martuar më parë, martesë nga e cila kishte 2 vajza. Autori ishte problematik edhe në fshatin Buçimas, ku fqinjët shprehen se kishin frikë të dilnin, pasi trembeshin nga ai. Gjithashtu në momentin e ngjarjes ata tonë që kanë dëgjuar ulërimat e 70-vjeçares për ndihmë, por nuk dolën pasi kishin frikë dhe lajmëruan menjëherë policinë.
