Nga Pano Sako
Lulzim Bashës më në fund i erdhën mendtë. Urime, se na plasi buzën. Shyqyr që e kuptoi që vetëm ndryshimi sjell ndryshim.
Urime dhe për artikulimin e plotë.
Jo 70%. Listat duhen hapur 100%.
Nuk ka pse të lihet fakultative në dorë të Kryetarit nëse do t’i hapë listat 100%, apo 70%. Në asnjë parti. Ata duhet të zgjidhen të gjithë nga populli.
Të drejtë për të zgjedhur deputetë duhet ta kenë të gjithë. Jo vetëm demokratët, LSI-stët, apo ata të partive të reja, por edhe socialistët. Madje socialistët kanë më shumë nevojë se të gjithë të tjerët për hapjen 100% të listave. Historia 7 vjecare e pushtetit rilindas është prova e gjallë që ajo parti e ka jetike hapjen e listave.
Urime dhe shoqërisë shqiptare që sot kaloi testin e parë të maturisë demokratike. Sot ka provën e gjallë që kur të gjithë bëhemi bashkë, nuk ka forcë që i rri përballë.
Por kujdes. Sot (dmth pas miratimi të hapjes së listave 100%, që sot duket si një ngjarje e sigurtë – Rama s’ka ku shkon, është në cep) politika e hoqi topin nga fusha e vet. Sot topi kalon në fushën e shoqërisë.
A do ta furnizojë dot shoqëria politikën me njerëzit e aftë, profesionistët e ndershëm që aq shumë ka sot nevojë politika?
A janë të gatshëm shqiptarët e ndershëm, profesionistët, të aftët e të ndihmojnë këtë vend të mbyllë tranzicionin 30 vjeçar që na piu gjakun?
Listat u hapën. Partitë do të jenë të detyrurara të thithin individët më të aftë, që i apelon kërkesës së popullit. A do të jenë të gatshëm profesionistët, apo do të mjaftohen me konstatime e kritika fejsbuku?
Nuk ka rëndësi nëse shkon te PS, PD, LSI, parti të tjera, apo bëjnë parti të re, – të gjitha janë pasuri publike të shqiptarëve- sot është koha që njerëzit e aftë, që kanë ide, që kanë dëshirë të vazhdojnë të jetojnë në ketë vend, të dalin dhe ta bëjnë. Sepse hapja e listave është mjeti. Cilësia në përfaqësim, në vendimmarrje dhe qeverisje është qëllimi.
Prandaj unë iu bëj thirrje të gjithë miqve të mi, profesionistë, të aftë e të ndershēm që po më lexojnë tani, kjo është koha për të vepruar. Nuk ka rëndësi në cilën parti do ta japësh kontributin tënd, e rëndësishme është ta bësh.
Nëse ky vend do të bëhet ndonjëherë, do ta bëjnë vetëm njerëzit që jetojnë në të. Kjo është e detyrueshme për tu kuptuar nga të gjithë.
