Ndarja e Mozzik nga Loredana ka qenë një nga ngjarjet më të komentuara të showbizz. Në sytë e publikut çifti dukej perfekt dhe sapo ishin bërë prindër të një vajze. Megjithatë asgjë nuk ishte ashtu siç pasqyrohej në mediat e tyre sociale apo në intervista, pasi ata i dhanë fund martesës.
Dy këngëtarët janë përfolur disa herë për rikthim, por Mozzik e ka hedhur poshtë këtë mundësi duke thënë se çdo gjë mes tyre ka marrë fund dhe se e vetmja gjë që i lidh është vajza e tyre.
Gjatë një interviste në emisionin “Sonte”, reperi u shpreh se nuk i vjen turp të flasë për këtë temë dhe se nuk ndihet fajtor për asnjë vendim që ka marrë në jetë. Duke mos dashur tregojë një arsye për ndarjen, ai tha se ishin shumë gjëra që e çuan drejt këtij vendimi, që sipas tij ishte i duhuri për të dhe Loredanën.
“Jam tip që nuk më vjen turp të flas për këtë temë sepse e dinë të gjithë. Fajtor nuk ndihem për asnjë vendim që kam marrë. Jam krenar që pas çdo vendimi që kam marrë i kam qëndruar besnik. Ajo është nëna e vajzës sime, unë jam babai i vajzës së saj dhe fajtor nuk ndihem për asnjë vendim që kam marrë. Jam i ri, 24-vjeç dhe kam karakter të paluhatshëm.
Hana do rritet dhe do e kuptojë. Do ia tregojmë në mënyrën më të lehtë që babi është i mirë. Ndarja nuk është e lehtë dhe janë shumë gjëra që e shkaktojnë. Thjesht mora një vendim dhe e di që ishte i mirë për të dy. Nuk mund të them një arsye, çdo gjë ndodh për një arsye. Ishte shok për shumë njerëz, e di,”- tha Mozzik.
Ndërsa shtoi se në jetën e tij ende nuk ka një femër tjetër, por që jeta vazhdon për të.
“Kundër nuk jam për një ‘Madam’ të dytë në jetën time. Por për momentin jo, jeta vazhdon. Nuk jam i fokusuar tek lidhja për momentin, por e di që do vijë ajo kohë. Me kohën besoj do vijë, është gjë e mirë që i ndodh çdo njeriu,”– përfundoi Mozzik.
