Kryetari i partisë Demokratike të Kosovës, Kadri Veseli ka rezultuar pozitiv me COVID-19.
Lajmi është bërë me dije nga vetë kreu i PDK i cili përmes një postimi në faqen e vet në Facebook shprehet se nuk ka probleme me shëndetin dhe se është vetizoluar.
“Të dashur qytetarë, pak çaste më parë u njoftova nga IKSHP se kam rezultuar pozitiv në testin e kryer për Sars-CoV-2.
Unë jam mirë me shëndet dhe deri në shërim të plotë do të qëndroj në vetizolim.
Ju ftoj të gjithëve që t’i respektoni masat, t’i vendosni maskat, të mbani distancën dhe higjienën!”, shkruan Veseli.
Pak javë më parë, edhe kreu i LDK, Isa Mustafa njoftoi se kishte rezultuar pozitiv në testin për COVID-19.
Situata në Kosovë vijon të paraqitet e rëndë për shkak të pandemisë së COVID-19, ku vetëm gjatë ditës së sotme u shënuan 181 raste të reja dhe 8 viktima.
