Gjyqtari i Apelit të Tiranës, Gjin Gjoni ka dhënë dorëheqjen nga detyra.
Ai ia ka paraqitur dorëheqjen KLP-së, duke argumentuar edhe arsyet, që sipas tij, e kanë shtyrë në këtë vendimmarrje. Në rast se dorëheqja e tij pranohet nga Këshilli i Lartë Gjyqësor, atëherë Gjoni nuk do t’i nënshtrohet procesit të vetingut.
Në letrën e dorëheqjes, Gjoni ka shkruar se procesi i vetingut nuk është i barabartë për të gjithë dhe se e kalon vetëm nëse i shërben politikës.
“Prej kohësh, sistemi i drejtësisë është në kolaps, lëvizjet dhe sita e vetingut nuk ka të njëjtat parametra dhe as kritere të barabarta për të gjithë, nëse je shërbëtor i politikës, nëse vulos dhe firmos pa u menduar, pa lexuar dhe pa iu nënshtruar ligjit dhe Kushtetutës e kalon, nëse je shpallur më parë armik i partisë nuk shihesh me sy të mirë dhe përfundon në rrugë. Shumë koletë të nderuar nuk i janë nënshtruar në mënyrë të barabartë ligjit, shumë kolegë që kanë dënuar eksponentë të krimit të organizuar janë flakur nga sistemi vetëm sepse nuk i do partia, ndërkohë që shumë të tjerë kanë kaluar pavarësisht paligjshmërisë së akumuluar sa një mal në ushtrimin e funksionit si gjyqtar”, shkruan mes të tjerash Gjin Gjoni, në letrën e dorëheqjes.
“Për 7 vite me radhë i jam nënshtruar sulmeve politike ngapërfaqësues të pushtetit ekzekutiv. E vetmja mënyrë që ka mbetur për t’i shërbyer publikut është që të dorëhiqem duke mos lënë padrejtësinë që të marrë përpara këdo vetëm nga frika e ‘pushkatimit pa gjyq’. Trupa që më gjykon mua dhe kolegët e mi, është në nivel që lë për të dëshiruar, 80% kanë qenë nëpunës të kësaj administrate“, shton ai.
