Ashtu siç pritej, Tirana, u shpall mbrëmjen e djeshme matematikisht kampione e Shqipërisë, titulli i 25-të ky në historinë e bardhebluve, një rekord absolut në futbollin shqiptar.
Ky vit përkon edhe me 100-vjetorin e krijimit të klubit dhe titulli ishte dhurata më e mirë për tifozët, por edhe për klubin.
Urimet për skuadrën kampione më të re të Shqipërisë kanë qenë të shumta, teksa nuk ka munguar një urim edhe nga Presidenti i Republikës, Ilir Meta. Ky i fundit nëpërmjet një postimi në faqen e tij zyrtare, publikon pamje nga festa e tifozëve ditën e djeshme, duke i uruar titullin Tiranës.
“Shumë urime TIRONËS, ekipit KAMPION dhe të gjithë tifozëve të mrekullueshëm bardhë e blu , të cilët i përshëndes me këto pamje fantastike nga festa e mbrëmshme që ndriçoi të gjithë kryeqytetin.
Titulli KAMPION, plotësisht i merituar, i shton hijeshinë 100-vjetorit të Tironës kryeqytet!
Ashtu siç me të drejtë i madhi Kasem Hallulli e përjetësoi në këngë:
“O Tiron Tirona,
Ti do të jesh KAMPIONIA”, shkruan Presidenti Meta në “Facebook”
