Kryetari i Partisë Demokratike, Lulzim Basha, tha se i vetmi përfundim i dialogut mes Kosovës dhe Serbisë është njohja reciproke.
Gjatë një konference për mediat në Prishtinë me kryeministrin Hoti, Basha u shpreh: “Ju ofroj mbështetjen e PD dhe opozitës së bashkuar për dialogun, që mund të ketë vetëm një përfundim, njohjen reciproke”.
Ndërsa vetë Hoti u shpreh se dialogu me Serbinë është vetëm politik dhe behet për njohjen reciproke.
Kreu i PD përsëriti në Prishtinë qëndrimin e tij ndaj bashkëpunimit ekonomik mes Shqipërisë dhe Kosovës.
“Ne vazhdojmë të themi potencialet janë të mëdha, që në fakt është mënyrë e sjellshme për të thënë që nuk kemi bërë aq sa duhet akoma, por ju siguroj se te PD do të keni një partner të devotshëm që ato punë që i kemi nisur, si rruga e Kombit dhe liberalizimi ekonomik në të dy anët e kufirit të vazhdojnë edhe më tej. Një ndër vendimet e para të mia si kryeministër i ri i Shqipërisë do të jetë heqja e traut në Rrugën e Kombit. Një vendim i padrejtë që rëndon ekonominë e Kosovës dhe të Shqipërisë”, tha Basha.
