Një i ri në Tiranë është arrestuar pasi akuzohet se ka përdhunuar një vajzë. Ngjarja për të cilën akuzohet i riu ka ndodhur në një hotel në kryeqytet, në zonën e njohur si “Qyteti Studenti”.
Një 19-vjeçar me inicialet L. H., 19 vjeç u arrestua nga specialistët për Hetimin e Krimit në Komisariatin e Policisë Nr. 1, bëri me dije sot policia e Tiranës.
Prangosja, shtuan të njëjtat burime, “erdhi pasi në ambientet e një hoteli, në rrugën ‘Sotir Kolea’, ai ka kryer marrëdhënie seksuale me dhunë me një 22-vjeçare”.
Ndërkaq, burime policore thanë se ka qenë vajza ajo që ka bërë kallëzim në polici. Vajza është shprehur se raporti intim mes tyre ndodhi pa konsensusin e saj dhe 19-vjeçari e arriti qëllimin duke përdorur forcën.
Burime policore thanë se vajza ka dëshmuar që kishte shkuar me dëshirën e saj në hotel me djalin, por e kishte kundërshtuar kërkesën e tij për kryer marrëdhënie intime. Në këto kushte, sipas kallëzimit të së resë, i riu ka abuzuar me të duke përdorur forcën.
Pas denoncimit, blutë u vunë në lëvizje, duke lokalizuar dhe vënë në pranga 19-vjeçarin.
