Avokati Ledoi Braho u shpreh se kryeministri Edi Rama po tenton tu bëjë presion drejtuesve dhe efektive të policisë me ndryshimet në ligjin për vetingun në polici.
Presidenti Ilir Meta ktheu sërish në Kuvend ligjin e rivlerësimit të punonjësve në polici. Sipas dekretit të Presidentit Meta, me heqjen e afatit në prag të zgjedhjeve të përgjithshme, “presioni përmes vlerësimit kalimtar (vetting-ut), bëhet akoma më i dëmshëm dhe i rrezikshëm për garantimin e paanësisë së forcave policore e për pasojë, tepër shqetësues”. Presidenti shtoi se procesi i vetingut në këtë periudhë “ka gjithë premisat që të keqpërdoret së tepërmi në situata të veçanta, sidomos përgjatë procesit zgjedhor”.
Avokati Braho, në një intervistë televizive, shpjegoi pasojat që mund të ketë kalimi i projektligjin në një kohë kur para janë zgjedhjet parlamentare.
“Policia e Shtetit është një strukturë shumë e rëndësishme gjatë zgjedhjeve. Siç po ndodh amnistia fiskale para zgjedhjeve, po ndodh dhe kjo. Presidenti thotë që u bën favor drejtuesve të Policisë. Unë do e konsideroja më tepër presion aq tepër duke hequr afatin, që është shumë i rëndësishëm në një proces vetingu. Se në momentin që ti heq afatin, i lë litarin varur gjatë gjithë kohës drejtuesve të policisë dhe efektivëve të policisë. Kjo është mënyra më e mirë për ti përdorur politikisht gjatë fushatës së ardhshme elektorale. Dhe duhet të kemi parasysh që vijmë pas precedentit të Dibrës, pas precedentit të Durrësit, kur e kemi të faktuar përfshirjen e policisë dhe drejtuesve të policisë në pjesën e votave, administrimit zgjedhor, në një mënyrë që shkon gjithmonë në favor të kësaj mazhorancës. Dhe ky ndryshim me të drejtë konsiderohet nga Presidenti si një ndryshim që mund të cënojë lirinë e zgjedhjeve”, tha Braho.
Avokati parashikon që pavarësisht dekretit të Metës, mazhoranca do miratojë ndryshimet ligjore.
“Kjo do të sjellë një Polici që do jetë gjatë gjithë kohës, nën presionin e mazhorancës”, tha avokati.
