Policia e Tiranës arrestoi disa persona për vepra të ndryshme penale. Mësohet se është arrestuar një 34-vjeçar pasi në lokalin e tij në “Rrugën e Vilave” janë gjetur doza të ndryshme me lëndë narkotike të dyshuar si cannabis sativa ndërkohë janë proceduar penalisht edhe 6 të tjerë për “moskallëzim krimi”.
Gjithashtu edhe një i mitur mësohet se është arrestuar, pas ka goditur me kaçavidë një tjetër duke e lënë të plagosur fatmirësisht jashtë rrezikut për jetën.
Ndërsa Policia e Kavajës ka njoftuar se është arrestuar në flagrancë një 43-vjeçar, pasi në lagjen Nr. 2, Kavajë, në banesë, ka ushtruar dhunë fizike dhe psikologjike ndaj motrës së tij.
Njoftimi i Policisë së Tiranës:
Tiranë
Vijon puna nga strukturat e Drejtorisë Vendore të Policisë Tiranë, për parandalimin, evidentimin dhe goditjen e paligjshmërisë.
Gjatë 24 orëve të fundit janë vënë në pranga 7 shtetas dhe janë proceduar penalisht 7 shtetas të tjerë, për vepra të ndryshme penale.
Nga Seksioni për Hetimin e Narkotikëve u bë arrestimi në flagrancë i shtetasit B. L., 34 vjeç, si edhe u referuan materialet për shtetasit D. H., A. L., B. V., E. GJ., E. C dhe A. Y., sepse pas një raportimi në Komisariatin Dixhital se në Rrugën e Vilave, në lokalin në pronësi të shtetasit B. L., shitej lëndë narkotike e llojit kokainë dhe cannabis sativa, shërbimet e Policisë kanë ushtruar kontroll dhe kanë konstatuar në lokal shtetasit e lartpërmendur.
Gjatë kontrollit fizik dhe të ambientit përreth janë gjetur dhe sekuestruar doza me lëndë të dyshuar cannabis sativa. Në përfundim të hetimeve u bë arrestimi në flagrancë i shtetasit B. L., për veprat penale “Prodhimi dhe shitja e narkotikëve” dhe “Përshtatja e lokalit për përdorim droge”, u proceduan penalisht, për veprën “Prodhimi dhe shitja e narkotikëve” shtetasit D. H., A. L., B. V dhe E. GJ., ndërsa shtetasit E. C. dhe A. Y. u proceduan penalisht për veprën penale “Moskallëzim krimi”.
Po nga specialistët për Hetimin e Krimit në Komisariatin e Policisë Nr. 6 u bë arrestimi në flagrancë i shtetasit të mitur me iniciale L. D., 15 vjeç, pasi gjatë një konflikti për motive të dobëta ka goditur me send të fortë (kaçavidë) shtetasin E. B., i cili ndodhet në spital, jashtë rrezikut për jetën.
Ndërkohë, nga specialistët për Hetimin e Krimit në Komisariatin e Policisë Kavajë u bë arrestimi në flagrancë i shtetasit A. Sh., 43 vjeç, pasi në lagjen Nr. 2, Kavajë, në banesë, ka ushtruar dhunë fizike dhe psikologjike ndaj motrës së tij.
Specialistët e Qarkullimit Rrugor bënë arrestimin në flagrancë të shtetasve:
XH. H. dhe XH. C., pasi u kapën në flagrancë duke drejtuar mjetet në gjendje të dehur.
Materialet i kaluan Prokurorisë së Rrethit Gjyqësor Tiranë, për veprime të mëtejshme.
