Ish-drejtuesja e Prokurorisë për Krime të Rënda, Donika Prela, ka kërkuar përjashtimin e dy Natasha Mulaj dhe Ina Ramës si pjesë e trupës gjykuese në KPA, ku po përballet me Vetting.
Prela tha se dy gjytaret e trupës së KPA kanë konflikte interesi me të. Ajo sqaroi se konflikti i interesit me Ina Ramën ka të bëjë me faktin se i ka hetuar mbesën, Izabela Demirajn.
Kjo e fundit, sipas Prelës, ka kërkuar që të punësohet në Gjykatë si psikologe, por pas hetimeve, ajo i ka zbuluar se kishte diplomë false.
“IKP ka paraqitur ankimim në KPA për mua. Kërkoj përjashtimin e gjykatëseve Natasha Mulaj dhe Ina Rama.
Kam pritur që Rama të jepte vetë dorëheqjen. Kam konlfikt interesi me të pasi kam kryer hetime për mbesën e Ina Ramës.
Mbesa e Ramës ka qenë sekretare në Gjykatën e Durrësit dhe i është kërkuar plotësimi i dosjes bashkë me diplomimin.
Ajo ka refuzuar edhe është larguar nga puna. Më pas ka bërë kërkesë për të punuar si psikologe në Gjykatë. E hetova dhe i zbulova diplomën e falsifikuar. Kërkova pezullimin e saj nga detyra dhe gjykata e pranoi”, tha Prela.
Ndërsa përsa i përket konfliktit me Natasha Mulajn, Donika Prela sqaroi se në mes është hetimi i vëllezërve të gjyqtares.
“Vetëm javën e fundit e kam kuptuar këtë konflikt, kështu që kërkoj edhe përjashtimin e kryetares së trupit gjykues, Natasha Mulaj.
Nuk besoj se ju zonja Mulaj jeni në dijeni. Në vitin 2019, për një rast të ngjashëm me timin KPA vendosi të pranojë kërkesën e Natasha Mulajt”, tha Prela. /abcnews.al/
