Prej më shumë se një muaji ka një shtim të rasteve me Covid-19, ndërsa shifrat konsiderohen si alarmante nga Ministria e Shëndetësisë.
Kjo e fundit fajëson kryesisht qytetarët që nuk respektojnë masat, si distancimin social apo mbajtjen e maskës në ambiente të mbyllura, apo në rastet kur është e pamundur respektimin i distancës.
Paralelisht me shtimin e rasteve, në Shqipëri nisi nga funksioni edhe transporti publik, bazuar në një rregullore sigurie.
Por çfarë ndodh sot në urbanët e Tiranës, sa respektohen masat?
Fotot e mëposhtme tregojnë se udhëtarët pavarësisht se mbajnë nga një maskë janë ngjitur me njëri-tjetrin, çka do të thotë se nuk ka asnjë shans për tu mbrojtur apo ruajtur distancën.
Megjithëse në fillimin e rinisjes së aktivitetit u fol për kapacitetet me të cilat duhej të operohej në urbanë, sot duket se asgjë nuk respektohet. Dhe në kushtet kur një pjesë e konsiderueshme e qytetarëve, mund të mos dinë as si të mbajnë maskën mbrojtëse, nuk është aspak e çuditshme që pas QSUT, ky lloj transporti, pa rregulla, të kthehet në një “bombë” për përhapjen e Covid-19.
Bashkia e Tiranës dhe çdo institucion tjetër përgjegjës nuk mund të fshihen as pas operatorëve, as pas qytetarëve, që deri më sot fajësohen për mosrespektimin masash, ndërsa qëndruan të mbyllur për 3 muaj në një izolim total.
Mungesa e një strategjie apo kontrolli në respektimin e atyre procedurave që vetë I kanë publikuar, minimalisht bën përgjegjës moralë, ndoshta edhe ligjorë, këto institucione, që në njërën anë lejuan transportin urban dhe në anën tjetër nuk u përgjigjën kërkesave për të garantuar shëndetin e qytetarëve.
