Disa muaj më parë, UEFA dënoi Manchester City-n, teksa e përjashtoi nga pjesëmarrja në Ligën e Kampioneve për dy sezonet e ardhshme. Gjithashtu në drejtim të “Qytetarëve” erdhi edhe një gjobë prej 30 milionë eurosh.
Gjithsesi skuadra angleze nuk u pajtua me këtë vendim të qeverisë së futbollit në Europë dhe vendosi ta apelojë vendimin në Gjykatën e Arbitrazhit Sportiv (CAS). Përgjigja përfundimtare erdhi paraditen e djeshme teksa CAS rrëzoi vendimin e UEFA-s dhe tashmë Man.City është e lirë të marrë pjesë në kompeticionet europiane.
Rikthimi i Mançester City-t në futbollin europian, nuk i ka pëlqyer shumë trajnerit të Liverpool, Jurgen Klopp. Tekniku i kampionëve të rinj të Anglisë Jurgen Klop e konsideroi vendimin e tribunalit të Gjykatës së Arbitrazhit Sportiv si “një ditë e keqe për futbollin”. Ai theksoi se thyerja e rregullave të konkurrencës së pastër financiare në futboll e dëmton garën.
“Nuk e di si të përgjigjem. Është një temë serioze. Të jem i sinqertë, nuk mendoj se dje ishte një ditë e mirë për futbollin. Fair-Play Financiar është një ide e mirë për futbollin. Nuk më takon mua të gjykojë, por nëse nuk respektohen rregullat, garat bëhet e vështirë”, deklaroi trajneri i Liverpulit Jurgen Klop për heqjen e dënimit të Mançester City-t.
