Marcelo Brozoviç, po kalon një moment të vështirë për sa i përket aspektit profesional dhe shkak për këtë janë bërë dëmtimet e shumta gjatë sezonit.
Por telashet për kroatin vazhdojnë edhe në jetën e tij personale. Natën mes të premtes dhe të shtunës mesfushori i Interit, në bordin e makinës së tij “Rolls Royce Cullinan” (motor me 600 kuaj fuqi dhe çmimi mbi 350 mijë euro), u ndalua nga një patrullë e karabinierëve pasi kishte kaluar me semaforin e kuq në Piazza Cantore, jo larg nga zona e Naviglit, në Milano.
Kroati iu nënshtrua testit të alkoolit, i cili rezultoi pak përtej kufijve të lejuar. Policia i merr patentën. Rezultati i provës së alkoolit: 0,54 gramë alkool për litër gjaku, pak më i lartë se kufiri maksimal i lejuar me ligj prej 0.50, por i mjaftueshëm sa duhet për sanksionin.
Brozoviç u gjobit edhe për targën gjermane të makinës, e cila është e regjistruar në emër të një kompanie me qendër në Mynih, pavarësisht se është banor në Itali prej më shumë se 60 ditësh.
