Në të njëjtën ditë si sot, 6 korrik, por 11 vite më parë, në “Santiago Bernabeu” do të prezantohej ylli portugez i futbollit, Cristiano Ronaldo.
Ai vinte nga Manchester United, klub ku kishte fituar gjithçka në nivel kolektiv dhe individual dhe vendosi të largohej nga vendi ishullor për të ndjekur ëndrrën e fëmijërisë së tij.
Real Madrid i verës së vitit 2009 ishte një skuadër jo në elitën evropiane me shumë probleme të trashëguara ndër vite dhe për më tepër përballë kishin Barcelonën e cila në atë kohë ishte ndoshta skuadra më e mirë e të gjitha kohërave.
Por Florentino Perez i kishte idetë e qarta dhe rindërtimi duhej të fillonte nga Ronaldo. Plot 85.000 tifozë e përcollën në stadium prezantimin e portugezit dhe miliona persona anembanë botës e ndoqën këtë moment të veçantë në historinë e futbollit.
Sezoni i parë me Real Madrid ishte pozitiv për Ronaldon në aspektin individual por jo në atë kolektiv. Ronaldo në atë sezon pësoi një dëmtim në kyçin e këmbës që e mbajti jashtë fushave për rreth 2 muaj por që gjithsesi arriti të shënonte 33 gola në 35 paraqitje.
Barcelona e drejtuar nga Pep Guardiola ishte e paprekshme dhe për pasojë Real Madrid e mbylli sezonin pa trofe. Ndërkohë me kalimin e kohës, projekti me në krye Cristiano Ronaldon filloi të funksiononte ku diferencat me Barcelonën nisën të reduktoheshin në vitet pasardhëse, ku në vitin 2011 Los Blancos arritën t’i rrëmbenin Barçës Kupën e Mbretit në një finale drithëruese të vendosur pikërisht nga Ronaldo me një goditje me kokë. Ndërkohë 1 vit më vonë Real Madrid arriti të fitonte La Ligën në një duel të zjarrtë me rivalët e tyre.
Në këtë përvjetor ia vlen të rikujtojmë “plamaresin” e portugezit me fanellën e “Los Blancos”:
4 Liga Kampionesh
– 3 Botërorë për Klubet
– 3 Superkupa të Europës
– 2 tituj kampioni në La Liga
– 2 Kupa Mbreti
– 2 Superkupa të Spanjës
– 4 “Topa të Artë”
– 3 “Këpucë të Arta”
– 2 çmime “The Best FIFA”
– Golashënuesi më i mirë historik i klubit (450 gola në 438 ndeshje).
