Presidenti i SHBA-ve, Donald Trump, deklaron se vaksina ndaj koronavirusit do të jetë gati përpara fundvitit.
“Dua të dërgoj falënderimet tona për shkencëtarët dhe studiuesit në të gjithë vendin dhe madje edhe në mbarë botën, të cilët janë në ballë të përpjekjes sonë historike për të zhvilluar me shpejtësi dhe ofruar trajtime për shpëtimin e jetës dhe përfundimisht një vaksinë. Ka të ngjarë të kemi një zgjidhje terapeutike ose vaksinë shumë përpara fundit të vitit”, tha ai.
Duke folur në lidhje me shtimin e rasteve të reja, Trump theksoi se administrata e tij ka zhvilluar më shumë se 40 milionë teste në të gjithë vendin.
“Ne u goditëm nga virusi që vinte nga Kina. Dhe ne kemi bërë një përparim të madh, strategjia jonë po ecën mirë. Ne kemi mësuar se si ta shmangim. Ne kemi bërë ventilatorë atje ku nuk kishte asnjë, me dhjetëra mijëra, deri në atë pikë sa kemi shumë më tepër sesa duhen. Por tani ne kemi testuar pothuajse 40 milion njerëz”, shtoi ai.
Deri më tani, SHBA regjistrojnë rreth 3 milionë raste infektimi dhe mbi 132 mijë viktima. Ndërkohë, më shumë se 1,5 milionë raste janë ende aktive.
