Gjeorgjina Kuli, shefja e Infektivit të Pediatrisë, tha sot se gjendja e foshnjes 2 muajshe që ka shfaqur simptoma të Covid-19 është e stabilizuar bashkë me nënën e tij.
Sipas Kulit, ata në orët e fundit nuk kanë shfaqur shifra të larta të temperaturës.
“Dhe nëna ka shenja të sëmundjes, të dy janë të hospitalizuar tek ne pasi fëmija është me gji. Janë në trajtim dhe observim nga mjekët. Për momentin, deri tani që flasim, gjendja është e stabilizuar”, sqaroi mjekja.
Kuli deklaroi se rreth 110 fëmijë janë prekur nga COVID-19 nga marsi por asnjë nga këta nuk ka kërkuar hospitalizim.
Duke shtuar se 25% e fëmijëve të prekur nga Covid-19 në Shqipëri janë aktivë, shefja e Infektivit të Pediatrisë tha se shpresa është që të mos ketë të tjerë që kanë nevojë për hospitalizim.
