Një i dënuar ka vënë në alarm Komisariatin e Policisë Bulqizë dhe drejtorinë e Burgut të Sigurisë së Lartë Burrel. Tre muaj më parë ai u dërgua me leje pranë familjes, por nuk u rikthye brenda afatit ligjor në qelitë e burgut ku vuante dënimin.
Burime pranë Policisë Bulqizë thanë se shtetasi Ertigen Alla, i dënuar për disa vepra penale nuk është rikthyer në burg me datë 25 Qershor 2020, ora 12.00.
“I dënuari duhet të rikthehej në burg me datë 25, siç kishte deklaruar kur u largua me leje për 3 muaj, për shkak të pandemisë.
Dy a tri orë pas shkeljes së lejes, autoritetet mbërrijnë në banesën e Allës dhe kërkojnë rikthimin e tij në qeli. Por familjarët u janë përgjigjur se ai po udhëtonte drejt Burrelit”, bëjnë me dije burime për mediat.
Pas mbërritjes në Burrel autoritetet e burgut kanë kuptuar se ata ishin mashtruar dhe se i dënuari kishte vendosur të mos kthehej në qeli, pavarësisht se kishte më pak se një vit për të vuajtur në qeli.
Ka dyshime se i dënuari është telefonuar privatisht nga drejtori i Burgut për t’u kthyer në qeli dhe se ai para pak ditësh është përfshirë në krime të tjera në qytetin e vendlindjes. Kjo ka alarmuar Komisariatin e Policisë Bulqizë. Kërkimet për kapjen e Allës vijojnë.
