Sejko: 17 mijë persona humbën punën nga COVID-19

17 mijë persona kanë humbur vendin e punës për shkak të masave shtrënguese të vendosura nga autoritetet për ndalimin e përhapjes së koronavirusit. Shifra u njoftua nga Gent Sejko, Guvernatori i Bankës së Shqipërisë, në një deklaratë për mediat, këtë të mërkurë.

Sejko thotë se, pritet një rënie e ndjeshme e ekonomisë në bazë të treguarve të 3-mujorit të parë. Piku i rënie pritet të arrihet në 3-mujorin e dytë të vitit, ndërkohë që vendi sipas parashikimeve do t’i rikthehet rritjes ekonomike vetëm në vitin 2021.

Sejko nënvizoi se “pandemia e coronavirus ka goditur ekonominë shqiptare”, pasi ka një tkurrje prej 2.5% në periudhën janar-mars, ndërsa papunësia ka shkuar në mbi 11%, pasi 17 mijë persona kanë humbur vendin e punës për shkak të masave shtrënguese.

LEXO EDHE  Defekti në rrjetin elektrik lë Drimadhesin pa energji

Guvernatori i BSH-së tha më tej se, rritja e borxhit publik është një kompromis i pranueshëm në këtë situatë, ndërsa shtoi se, rikthimi i një vale të dytë të pandemisë do të rrisë problemet ekonomike.

“Në gjysmën e dytë të vitit 2021 do të ketë një stabilizim të ekonomisë. Politikat që kemi marrë kanë zbutur krizën. Është rritur borxhi publik. Ekonomia gjithsesi do të varet nga fakti sesa do të zgjasë pandemia e COVID-19”, tha z. Sejko.

Edhe pse të dhënat e 3-mujorit të dytë nuk janë bërë të ditur, Guvernatori i Bankës së Shqipërisë tha se, nga të dhënat paraprake eksportet kanë rënë me 33%, kurse importet janë tkurrur me 30%.