Sulmuesi i Bayern Munich, Robert Lewandowski, ka fituar çmimin e lojtarit më të mirë të sezonit 2019-2020 në Bundesligë.
Polaku po përjeton sezonin e karrierës me Bayern Munich dhe momentalisht kryeson garën për Këpucën e Artë në Europë. 31 vjeçari gjithashtu u bë lojtari i parë, që shënoi në 11 ndeshje radhazi të Bundesligës.
Lewandowski ka shënuar kundër secilës prej skuadrave, që luajnë aktualisht në elitën e Gjermanisë. Pasi ka kapërcyer 33 gola në kampionat, këtë sezon, polaku shpallet “Këpuca e Artë” e Bundesligës për herë të katërt në pesë sezone.
Ai deklaroi në fillim të këtij muaji se ende nuk e ka arritur kulmin, edhe pse në moshën 31-vjeçare:
“Unë nuk jam ende në periudhën më të mirë të karrierës. Së shpejti do të jem. Por, të gjithë këto janë thjesht numra. Jam i sigurt se momenti më i mirë i karrierës sime do të vijë shpejt. E di që kjo nuk është kontrata ime e fundit. Dua të luaj më gjatë dhe të qëndroj në top-formë. Kam gjithë kohën para që të mendoj për të ardhmen, por ndihem vërtet mirë. Unë do të festoj ditëlindjen e 32-të në gushtin e ardhshëm, por kjo nuk do të thotë se ndjehem në këtë moshë. Ajo që dua nuk është vetëm të qëndroj në krye për dy ose tri vitet e ardhshme, po shoh në një plan më afatgjatë. Nuk mendoj për “Topin e Artë”, edhe pse në jetën time besoj se çdo gjë është e mundur”.
