Pothuajse një vit më parë, Tottenham, pagoi plot 62 milionë euro dhe 10 milionë të tjera në formën e bonusit për ish-mesfushorin e Lyonit, Tanguy Ndombele.
Francezi u bë kështu blerja më e shtrenjtë në historinë e Tottenhamit, duke thyer çdo record të mëparshëm.
Megjithatë aventura e francezit në kampionatin anglez nuk po shkon aspak mirë, ku pas vështirësive me Pochettinon, tashmë ai nuk preferohet as nga Jose Mourinho.
Tekniku portugez dhe mesfushori mësohet se kanë debatuar ashpër të hënën, fillimisht në fushën e stërvitjes dhe më pas në zyrën e Mourinhos, pasi ky i fundit i kishte theksuar se nuk është ende gati për të luajtur.
“Special One” nuk është aspak i kënaqur me gjendjen fizike të futbollistit, por mbi të gjitha me angazhimin e tij në stërvitje, ndërsa vetë Ndombele ka reaguar ashpër dhe i ka thënë Mourinhos se nuk do të luajë më sa kohë që ai është trajner i Tottenham.
Këto detaje i zbulojnë tabloidët anglezë, sipas të cilëve tashmë te Tottenham po punojnë për të gjetur një tjetër skuadër për mesfushorin francez, që nuk po justifikon aspak paratë e investuara për blerjen e tij.
