Lista e borxhlinjve të këqij në tatime u zgjerua me 14 për qind gjatë pesë-mujorit të parë të vitit 2020 në raport me të njëjtën periudhë të 2019.
Sipas listës së azhurnuar nga Drejtoria e Përgjithshme e Tatimeve shihet se numri i bizneseve që nuk kanë paguar detyrimet tatimore në kohë ka arritur në 4057 subjekte, nga 3460 që ishin në të njëjtën periudhë të një viti më parë. Por lista pritet të zgjerohet edhe më tej gjatë muajve në vijim sidomos përtej shtatorit pasi, qeveria me vendim të posaçëm ka shtyrë pagesat e disa tatimeve në kohë.
Masat kufizuese që u aplikuan përgjatë muajve mars, prill dhe maj kanë penguar aktivitetin normale të administratës dhe biznesit, duke bërë që një pjesë e madhe e borxhlinjve reale të mos reflektohen në regjistrin e tatimeve.
Me azhurnimet e fundit, numri i bizneseve ndaj të cilave ka nisur mbledhja e detyrimit me forcë arriti në 31,184 në maj.
Gjatë vitit të kaluar, borxhi tatimor u zgjerua me 9 për qind, duke arritur vlerën e 117 miliardë lekëve ose rreth 953 milionë euro, sipas të dhënave zyrtare të Tatimeve. borxhi tatimor ka pësuar një rritje prej neto 9.3 miliardë lekë në krahasim me fillimin e vitit. Por pavarësisht zgjerimit të detyrimeve, Drejtoria e Përgjithshme e Tatimeve ka arkëtuar me forcë 22,5 miliardë detyrime tatimore.
Në stokun e borxhit të ndarë sipas llojit të tatimit, TVSH zë peshën më të madhe ne stokun me borxhit me 35% në vlerë 40,4 miliardë lekë, e ndjekur nga Tatim Fitimi me 27% në vlerë 31,6 miliardë lekë, zëri “Të Tjera” me 24% në vlerë 27,9 miliardë lekë.
Sigurimet Shoqërore & Shëndetësore me 13% në vlerë 15,1 miliardë lekë dhe TAP me 2% në vlerë 1,9 miliardë lekë.
Krahasuar me fundin e vitit 2018, gjatë vitit 2019, TAP ka qëndruar në të njëjtin nivel, ndërkohë që TVSH është rritur me 1.1 miliardë lekë, Tatim Fitimi me 1.4 miliardë lekë, Sigurimet Shoqërore dhe Shëndetësore me 1.3 miliardë lekë dhe zëri Të Tjera me 5.2 miliardë lekë.
Përgjatë këtij viti borxhi tatimor pritet të zgjerohet edhe më tej për shkak të efekteve negative të pandemisë. /Monitor/
