Ministrja e Shëndetësisë, Ogerta Manastirliu, deklaroi sot rihapjen e transportit publik, përfshji këtu edhe atë ndërqytetas.
Ndërkohë disa nga operatorët në qytete të ndryshme kanë reaguar pozitivisht, duke shprehur menjëherë gatishmërinë për të rifilluar punën.
Transporti publik interurban në Shkodër do të rifillojë aktivitetin duke filluar nga dita e nesërme (24 qershor). Përfaqësues të këtij sektori në Shkodër thanë se puna do të rifillojë pasi kanë 4 muaj ndërprerje dhe se ndodhen në situatë të vështirë ekonomike. Ata shprehen se do t’i respektojnë protokollet anti-covid.
“Shoqëritë e transportit urban dhe interurban të qarkut të Shkodrës do fillojnë daljen në punë. Kemi 4 muaj pa punë, rrezikohemi na ana ekonomike, luftojmë për bukën e gojës. Ditën e mërkurë, linjat tona ndërqytetase do fillojnë punën në orën 6 të mëngjesit deri në orën 5 mbasdite nga Tirana, si dhe nga linjat e tjera. Do t’i respektojmë të gjitha rregullat, jemi pajisur me të gjitha mjetet”, shprehen ato. Hapja e transportit urban në Shkodër vjen në një kohë kur ky sektor ka zhvilluar disa protesta në Tiranë dhe kanë refuzuar rinisjen e aktivitetit”.
Sipas tyre, është e pamundur të rifillohet puna, nëse më parë qeveria nuk u plotëson atyre disa kushte. Ata kërkojnë subvencionimin e të ardhurave të munguara për subjektet transportuese si pasojë e kufizimit nga protokolli i sigurisë, heqja e arkcizës dhe taksave të karburantit siç është zbatuar edhe në sektorë të tjerë të ekonomisë, zbritja e TVSh-së në shitje nga 20 përqind në 0 përqind për vitin 2020.
Po nesër, do të hapet transporti ndërqytetës edhe në Fier. Ilir Lule, kryetar i Shoqatës së Transportit ka sqaruar se kompanitë kanë pësuar humbje, e megjithatë kjo nuk do të reflektohet në çmim.
“Ne jemi gati të zbatojmë protokollin. Nuk e dinim se do dilte ministrja, ne dolëm këtu në këtë protestë të organizuar më parë. Ne duam vetëm të dalim në punë. Do mbajmë të njëjtin çmim”, shprehet ai.
