Laçi mundi pastër 2-0 skuadrën e Kukësit duke “mbyllur” praktikisht luftën për titullin kampion me Tiranën që e sheh veten 9 pikë para sërish.
Kjo ngriti aludime se mund të kishte një premio nga bardheblutë për kurbinasit. Në pamje të parë një pretendim i tillë është qesharak, pasi duke parë tabelën e klasifikimit, tre pikët ishin jetike për Laçin për të vazhduar rrugën e tyre drejt sigurimit të një vendi në Kupat e Europës dhe klubi nuk kishte nevojë për një “nxitje” nga jashtë.
Gjithsesi për të mohuar këto zëra, klubi laçian ka dalë me një deklaratë për media ku tregon se nuk ekziston një mundësi e tillë. Laçi kërkon që të mos nxiten zëra të tillë dhe të hidhet baltë mbi punën e lojtarëve dhe stafit teknik.
Postimi i klubit të Laçit:
“Reagim i detyruar, mbi lajmet që qarkullojnë për një premio dhënë Klub Futboll Laçit, me qëllim ndalimin e Kukësit. Në ndeshjen e djeshme janë shumë më të shumta arsyet pse Laçi duhet të fitonte.
Së pari për të lartësuar emrin e qytetit që përfaqësojmë, së dyti për tifozët tanë, së treti për investimet e bëra dhe realizimin e objektivit sezonal. Sigurisht, trajneri dhe stafi i tij, ashtu sikurse edhe futbollistët, kanë egon e tyre dhe duan të fitojnë në çdo ndeshje. Mjafton t’i hedhësh një vështrim tabelës së renditjes dhe kushdo e kupton se Laçi nuk kishte nevojë për asnjë arsye të jashtme për ta mundur Kukësin.
Ekipi ynë dha maksimumin dhe bëri atë që ka për detyrë çdo ndeshje. Asnjë qindarkë nuk ka ardhur në drejtim të klubit tonë, sikurse pretendohet. Ndaj, në respekt të garës, të kampionatit, të djersës së lojtarëve dhe stafit, si dhe të punës së bërë nga çdo faktor në KF Laçi, mediat dhe kushdo do të ishte mirë të mos aludonte me lajme të tilla“, – shkruhet në deklaratën e Laçit.
