Mbrëmjen e sotme duke filluar nga ora 22:00, Real Madrid luan në transfertën e Real Sociedad në një sfidë që vendos shumë për fatet e titullit kampion në Spanjë.
“Los Blancos” do të kenë mundësinë ideale për të rimarrë kreun e kampionatit nëse arrin të triumfojë në transfertën e “San Sebastian’. Ndaj Barcelonës, madrilenët kanë favorin e ndeshjeve direkte, dhe nëse arrin të marrin pikët e plota nga tani e deri në fund të kampionatit mund të shpallen kampionë.
Por titulli për skuadrën e Zidane që po kalon një moment shumë të mirë forme kalon nga transferta delikate ndaj Real Sociedad.
Të dyja skuadrat do të kenë mungesa të rëndësishme për këtë ndeshje, ku për Real Sociedad bie në sy dëmtimi i Ilarramendi-t, Guevaras dhe Sangall-it, nga ana tjetër për Realin mungojnë, Isco, Jovic, Lucas dhe Nacho.
Objektivi i vendasve është sigurimi i një vendi në kupat evropiane, ku vendi i katërt që aktualisht mbahet nga Sevilla është ende në lojë dhe për pasojë sonte ekipi pritet t’i bëjë një rezistencë të madhe Realit të Madridit.
