Ndahet nga jeta në moshën 55 vjeçare shkrimtari i njohur spanjoll Carlos Ruiz Zafon. Mediat e huaja shkruajnë se Zafón ka ndërruar jetë në shtëpinë e tij në Los Angeles, pas një beteje të gjatë me kancerin.
Carlos Ruiz Zafón u diagnostikua me kancer në zorrën e trashë në vitin 2018.
Lidhur me vdekjen e tij ka reaguar Pedro Sanchez, kryeministri i Spanjës, i cili shkruan në Twitter se: “Ne kemi humbur një nga shkrimtarët spanjollë më të lexuar dhe të admiruar në botë. Zafon, një shkrimtar me vlerë i kohës sonë, dha një kontribut të rëndësishëm në letërsinë moderne”.
Shkrimtari, njihet për romanin e tij “Hija e erës”, i cili renditet ndër librat më të lexuar në botë, madje dhe në Shqipëri.
Autori i tetë romaneve që përfshijnë “Labirintet e Shpirtrave” apo “Loja e engjëllit”, Ruiz Zafon ka shitur më shumë se 38 milionë kopje në të gjithë botën. Sakaq është përkthyer në më shumë se 40 gjuhë dhe konsiderohet si shkrimtari më i lexuar spanjoll, pas Servantesit. Gjithë jetën e tij ia dedikoi karrierës duke fituar tituj pafund si një ndër shkrimtarët më të mirë.
